Jashan e Shahi 2024 Report

جشن شاہی 2024ء رپورٹ

مورخہ ۲۵ مارچ،2024ءبروزپیر،ڈھوک گوہرؔشاہی میں مرکزی سطح پرمرشد کریم حضرت سیّدناپرویزاخترگوہرشاہی مدظلہ العالی کی زیرسرپرستی چودہ اور پندرہ رمضان المبارک کی درمیانی شب کوجشن شاہی کی عظیم الشان اور پروقار تقریب نہایت عقیدت ومحبت سے منعقد کی گئی۔مرشد کریم کے پورٹریٹ،خوبصورت رنگارنگ لائٹس،بینروں سے پنڈال کو نہایت خوبصورتی کے ساتھ سجایاگیاتھا۔وسیع وعریض پنڈال میں کرسیاں لگائی گئی تھیں۔موسم نہایت ہی خوشگوار تھا۔ملک بھر سے آنے والے مہمانوں کے لیے تمام انتظامات مکمل اور احسن اندازمیں کئے گئے۔مہمانانِ گرامی کیلئے افطاری کابہت ہی اعلیٰ اور پرتکلف انتظام کیاگیاتھا،افطاری کے بعد نمازِ مغرب باجماعت اداکی گئی۔جشن شاہی کے اِس روحانی پروگرام میں مرشد کریم کے اہل خاندان کے علاوہ مقامی خواتین وحضرات اور ملک بھر سے ذاکرین نے بھرپور شرکت فرمائی۔پنڈال اپنی گنجائش کی حد تک بھراہواتھا۔پنڈال کے دوحصے کئے گئے تھے۔خواتین کے لیے پردے کا اعلیٰ انتظام کیاگیاتھا۔پروگرام کاآغازبعد نمازِ تراویح شب دس بجے تلاوت کلام پاک سے کیاگیا۔سیدغلام حسین شاہ گیلانی نے کمپئیرنگ کے فرائض سرانجام دئیے۔حمد باری تعالیٰ جناب رضوان بٹ نے پیش کی۔

جناب یٰسین قادری،جناب بلال احمد،اور جناب محمد وقار نے بارگاہِ رسالت مآبﷺ میں نعتوںکے نزرانے پیش کیے۔منقبت مولاعلیؑ جناب حسن گیلانی صاحب نے پیش کی۔جناب مہر اللہ یارنے سرکار غوث پاکؓ کی شان میں منقبت پیش کی۔جناب حاجی گلزار احمد،جناب سرفرازگوہر،جناب نذیراحمد،جناب محمد بلال،جناب محمد اشفاق قادری اور جناب محمد عثمان قادری نے مرشد کریم کی شان میں قصائد پیش کیے۔اس کے بعد محفل سماع منعقد کی گئی۔جناب منصور احمد قوال اور ہمنوا نے نعتیہ اور عارفانہ کلام پیش کیا۔

جناب ساجد سہیل نے محفل میں شریک تمام ذاکرین اور مرشدکریم کے اہل خاندان کو خوش آمدیدکہا اور جشن شاہی کی مبارکباد پیش کی۔اُنہوںنے کہاکہ مرشد پاک کافرمان ہے کہ :۔ آج کی رات ہمیں سب سے زیادہ عزیزہے۔کہ آج کی رات وہ ہے جب مرشد کریم اپنے بیوی،بچے،کاروبار چھوڑ کراللہ کی رضاکی خاطر لال باغ (سہون شریف) میں چلہ کش تھے تو چودہ اور پندرہ رمضان المبارک کی درمیانی شب کوآپ کو مرتبے سے نوازاگیا اور تاج پوشی کی گئی۔اُنہوںنے کہا کہ مرشد پاک نے اسم ذات اللہ کے فیض کو دُنیا بھر میں عام فرمایااور اپنی نشستوں میں امام مہدی ؑ کی آمد کے بارے میں گفتگوفرمائی۔یہ بھی فرمایاکہ امام مہدیؑ کووہی پہچانیں گے جن کے اندر اسم ذات اللہ کانور ہوگا۔جناب ساجد سہیل نے کہاکہ اب وہ وقت بہت قریب ہے کہ جب امام مہدیؑ کاظہور ہوگا۔انجمن سرفروشانِ اسلام کایہی مشن ہے کہ اسم ذات اللہ کے فیض کو ہرانسان تک پہنچایاجائے تاکہ ذکرکے باطنی نور سے امام برحق کی پہچان ہوسکے۔پھرآپ نے سرکار پاک حضرت سیّدناپرویز اخترگوہرشاہی مدظلہ العالی سے درخواست کی کہ وہ نئے آنے والے شرکاء کو ذکرقلب کی اجازت عطافرمائیں۔سرکار پاک نے سب شرکاء کو جشن شاہی کی مبارکباد پیش فرمائی اور سب کو اسم ذات اللہ ھُو کا قلبی ذکرعطافرمایا۔رات کو تقریباً ۳بجے اختتامی دُعاکی گئی،جناب حاجی عبدالحفیظ قادری نے دُعاکرائی۔دُعاکے بعد شرکاء کو پرتکلف سحری پیش کی گئی اور سحری کے بعد اجازت ِ عام دی گئی اور یہ اعلان کیاگیا کہ حسب روایت اس سال بھی جامع مسجدریاض الجنہ ڈھوک گوہر شاہی میں اجتماعی اعتکاف کااہتمام کیاجارہے خواہشمند حضرات اپنے نام اور موبائل نمبر لکھوادیں تاکہ انتظامات کوحتمی شکل دی جاسکے۔